少少肥延續《自修室‧學界嘅蘭桂坊》裏破格演出嘅的士佬的故事！
BOOM！！！！！爆屎渠爆到猶如山洪爆發一樣。
我隨住水流巴斯光年一飛衝天。
喺半空中嘅我，已經化為一滴屎水，我第一次望到呢個叫做香港嘅地方，有好多高樓大廈，好多車，好多人。
我眼底下嘅事物慢慢由細細粒愈變愈大，無錯，我開始跌緊返落地下，仲要係急速果隻！！！
大鑊！！！如果我喺跌落地下之前都搵唔到個好歸宿，一陣跌咗落地下，我就真係萬劫不復！一個唔覺意畀車車中，隨時變屎餅，永世都無機會投胎！
我對眼開始搜索位於地面嘅人類，但係佢哋全部都係做緊同一個動作，就係走佬。
「嘩爆屎渠呀，快啲走呀。」「好臭呀」「嘩爆屎渠呀」「快啲走呀」「嘩爆屎渠呀」「嘩屌爆屎渠呀好臭呀。」「嘩爆屎渠呀」「好臭呀」「快啲走呀」「嘩爆屎渠呀」「嘩爆屎渠呀」「快啲走呀」「好臭呀」
「嘩我成世人都未見過爆屎渠㗎，好撚多屎呀，影張相Post上Fb先。」
！？！？！？
呢句說話完全吸引到我，竟然有人咁得閒爆屎渠都影相，我立即將目光放喺呢條傻仔度。
我見到一個中年人，高高瘦瘦，灰色恤衫黑西褲，衫袋仲有塊領巾，睇嚟係一個普普通通嘅阿叔嚟。
個阿叔拎住部手機起勢咁影，郁都唔郁。
呢個時候個個都雞飛狗走，係得佢一個企喺度，係好機會！！
我乘住微風慢慢咁飄過去，靜靜雞咁降落喺佢衫袋入面塊領巾度。
阿叔佢好似感覺到有啲野黐咗上佢塊領巾，佢拎起塊領巾，對住我索咗索，突然面都青埋。
「嘩……屌……我……奶……屎……呀……好……撚……臭……呀！！！」
我一聽到呢句，個感覺就好熟悉，我就唔知點解無名火起！！
就係咁，我就暫時附身咗喺呢個男人身上。
作者簡介：
少少肥，高登網路紅人。《自修室‧學界嘅蘭桂坊》「完故」後仍有無數粉絲開Post「續故」，跪求外傳、番外篇、平行時空；更有巴打絲打改編歌詞創作主題曲、自作外傳，在高登風頭一時無兩。2015香港書展見面會時，讀者為見少少肥一面而迫爆會展。
